لك يوم يا حارم عيوني من النوم

لك يوم يا حارم عيوني من النوم
نفسي أشوفك تسهر الليل حسرة
ليت الهوى في داخلك يشتعل يوم
ليتك تحس الوقت لو بس مره

كافي تعيش افراح وعيش بهموم
كفك بوسط الماء وكفي بجمره
مدري الاقيها من الحكي واللوم
ولا الاقيها من سنــين مــــره

الحظ إذا طاح وش لون بيقوم
ماكل مره تسلم الكسر جره
كنت أحسبك من فرحة العمر محروم
لين أكتشفت انك تعيش ابمسره

كذبت قلت انك على الوصل محكوم
انت حياتك مثل ما تريد حره
مو مشكله كذبك يا سيدي اليوم
المشكله وشلون أصدقك بكره