حمرة سطيحاتك

حمرة سطيحاتك حمرة كلا رفوف عصافير
وخضرة طرقاتك خضرة رح بتلفك وتطير
وشبابيكك يا ضيعة مضوية ليل نهار
كل شباك وفي حلوة ووردة مليانة ازرار

وتميل هالسمرة ع ورودها الحمرة
توشوشها وتداريها وتسألها عن عمرها
تعبان لا تسأل يا قلب وتمهل
رح بتطل من الشباك وردة تقول تفضل

يومتها الوردات كانوا عطر ولون
ما كانوا حكايات وكون يضوي كون

وقال عاشق من ضيعتنا للبنت البيحبها
تزرعله وردة بشباكها تحكي حكاية قلبها
والحلوة زرعت والوردة طلعت
وصارت ليلية هالحلوة توقف تنطر جنبا

وقال عاشق من ضيعتنا للبنت البيحبها
تزرعله وردة بشباكها تحكي حكاية قلبها
والحلوة زرعت والوردة طلعت
عرفوا الحلوين وكل وحدة زرعت وردة حبا

يومتها الوردات الكانوا عطر ولون
صارو غنيات وكون يضوي كون

من سنين هالسمرة لورودها الحمرة
توشوشها وتداريها وتسألها عن عمرا
تعبان لا تسأل يا قلب وتمهل
رح بتطل من الشباك وردة تقول تفضل

كلمات: الأخوين رحباني
ألحان: الأخوين رحباني
غناء: فيروز