للصبر حدود

ما تصبرنيش بوعود
وكلام معسول وعهود
انا ياما صبرت زمان زمان
على نار وعذاب وهوان
وهي غلطة ومش حتعود
ولو ان الشوق موجود
وحنيني اليك موجود
انما للصبر حدود
يا حبيبي

صبرني الحب كتير
وداريت في القلب كتير
ورضيت عن ظلمك لكن
كل ده كان له تأثير
والقرب أساه وراني
البعد ارحم بكتير
ولقيتني وانا باهواك
خلصت الصبر معاك
وبأملي اعيش ولو انه
ضيع لي سنين في هواك
واهي غلطه ومش ح تعود
ولو ان الشوق موجود
وحنيني اليك موجود
انما للصبر حدود
يا حبيبي

اكتر من مرة عاتبتك
واديت لك وقت تفكر
كان قلبي كبير بيسامحك
انما كان غدرك أكبر
أكبر من طيبة قلبي
أكبر من طولة بالي
أكبر من قوة حبي
مع كل الماضي الغالي
ولقيتني وانا بهواك
خلصت الصبر معاك
وبأملي باعيش ولو انه
ضيع لي سنين في هواك
واهي غلطة ومش ح تعود
ولو ان الشوق موجود
وحنيني اليك موجود
انما للصبر حدود
يا حبيبي

ما تصبرنيش ما خلاص
انا فاض بيا ومليت
بين لي أنت الإخلاص
وانا اضحي مهما قاسيت
دامفيش في الدنيا غرام
بيعيش كده عالأوهام
والحب الصادق عمره
عمره ما يحتاج لكلام
وكفاية وانا بهواك
خلصت الصبر معاك
وباملي باعيش ولو انه
ضيع لي سنين في هواك
واهي غلطه ومش ح تعود
ولو ان الشوق موجود
وحنيني اليك موجود
انما للصبر حدود
يا حبيبي

كلمات: عبد الوهاب محمد
ألحان: محمد الموجي
غناء: أم كلثوم