El Walaa Ghanna

الولع غنّى وانا فيني ولع
هاضني مغناك يا ورق الحمام
مثلك اصوّت ولا حيٍ سمـع
مالقيت احدٍ ولو ينقل سلام

غيّبه عنّي زماني وانقطع
ولي يا وقت التفرّق والهيام
وين غيّبت اللي بقلبي زرع
زهرة الأشواق وغصون الغرام

يا قمر عمري الا منه طلع
خيّمت عقبك دياجير الظلام
كل حرٍ لين ضيّق به جزع
القهر ياصل به حدود العدام

كل مالمته هوى قلبي شفع
ذا حبيبي كيف محبوبي يِلام
لو تمادى بالتّغلي والدلع
ما تمادى بالقطيعه والخام

كلمات: دايم السيف
ألحان: طلال مداح